Leo, EF inabadilisha muundo wake, ikihitimisha mchakato wa miezi kadhaa wa kujipanga upya kama sehemu ya utekelezaji wa Jukumu na Sera ya Usimamizi wa Hazina.
Tunatoka katika mchakato huu tukiwa na muundo, shughuli, na watu wanaohitajika kwa ajili ya utekelezaji wa majukumu muhimu yaliyo mbele yetu, lakini pia tukiwa na wenzetu 54 pungufu, takriban 20% ya EF, ambao wengi wao watakuwa wakitafuta njia za kuchangia kwenye Ethereum kutoka nje ya EF katika wiki zijazo.
Chapisho hili linatoa utangulizi mfupi wa muundo mpya na maelezo kuhusu jinsi tunavyowasaidia watu wanaoondoka.
Muundo mpya
EF sasa ina makundi matano yenye nyanja tofauti za kazi – tabaka la itifaki, tabaka la ufikiaji, tabaka la mtumiaji, tabaka la jamii, na tabaka la taasisi – pamoja na kundi linalolenga shughuli za uendeshaji na lingine linalojumuisha usimamizi na timu zinazosaidia moja kwa moja kazi za usimamizi.
Kila nyanja ya kazi inahitaji mbinu tofauti, inawajibika kwa aina tofauti za matokeo, na ina muundo tofauti wa ndani ulioundwa kulingana na kazi inayohitaji kufanywa. Tutashiriki mengi zaidi kuhusu haya katika mwezi ujao, kwa hivyo kwa leo tutaishia kuyatambulisha kwa muhtasari mkuu.
Tabaka la Itifaki
Kundi la itifaki linabeba urithi na jukumu la EF la kuhakikisha kuwa Ethereum inatimiza ahadi yake ya msingi ya kupanua mamlaka binafsi. Inafanya hivyo kwa kuweka msingi wa kuimarisha na kupanua itifaki ya Ethereum yenyewe. Lengo lake ni kuhakikisha kuwa itifaki ya Ethereum inaendelea kutekeleza sifa zinazoifanya iwe na thamani ya kutetewa: upinzani dhidi ya udhibiti na utekaji, chanzo wazi na uwazi, faragha na usalama kama dhamana za itifaki zisizojadiliwa. Kundi la itifaki lipo ili kuhakikisha itifaki ya msingi inaendelea kusonga mbele bila kuathiri dhamana za mamlaka binafsi. Halipo ili kuifanya Ethereum iweze kuuzika zaidi au kulenga maslahi ya muda mfupi, au kurahisisha kuigeuza kuwa njia nyingine ya kifedha inayodhibitiwa na wapatanishi. Kazi yake ni kuifanya Ethereum iwe ngumu kuharibiwa au kutekwa, na iwe rahisi kutegemewa wakati wahusika wengine wanaposhindwa, majukwaa yanapodhibiti, serikali zinapovuka mipaka, na wapatanishi wanaponyonya. Hii inamaanisha kutoa maboresho (forks) kwa usalama, kupunguza ugumu usio wa lazima, kupunguza utegemezi unaoaminika, kutetea mfumo wa miamala dhidi ya MEV yenye madhara na mtiririko wa maagizo wenye upendeleo, na kuharakisha na kugeuza utafiti wa muda mrefu kama vile usalama wa baada ya kwanta (post-quantum security), zkEVM, na faragha ya tabaka la 1 (l1) kuwa mabadiliko ya itifaki yanayohifadhi na kuboresha mamlaka binafsi kwa kiwango kikubwa.
Tabaka la Ufikiaji
Tabaka la ufikiaji ni mahali ambapo Ethereum inawahudumia au inawashindwa watu wanaohitaji sifa za CROPS katika uhalisia. Kazi ya kundi hili ni kufanya mamlaka binafsi yapatikane, yaeleweke na yadumu katika vitendo muhimu: kusoma mnyororo, kufanya miamala, kuthibitisha, kukasimu, na kujitoa. Vitendo hivi lazima viungwe mkono kwa watumiaji, na kwa kiasi kinachoongezeka kwa mawakala wanaotenda kwa niaba yao, ambao lazima waweze kusoma hali ya sasa, historia, na data zinazohusiana bila kutegemea wapatanishi wasioweza kuwathibitisha. Wanapaswa kuweza kufanya miamala kwa faragha na bila hatari ya udhibiti, huku matokeo ya muamala yakiwa yamehakikishwa au kushindwa bila gharama ikiwa masharti hayajatimizwa. Kadiri mambo haya yanavyohamia kwa mawakala, watumiaji wanapaswa kuendelea kuwa na udhibiti, wakitoa mamlaka yenye mipaka na kuyabatilisha wapendavyo, na kuhifadhi malengo yao wenyewe badala ya kuyaweka wazi kwa wapatanishi. Miingiliano (interfaces), kuanzia kwenye silikoni hadi kwenye muonekano wa mbele (frontend), lazima iweze kuthibitishwa, kueleweka na kurejesheka, bila kujali ni mara ngapi mtu anaitumia au jinsi ujuzi wake wa kiufundi ulivyo wa kina.
Kanuni inayotumiwa na kundi hili ni chaguo la sifuri (zero option): kwa kila njia yenye mpatanishi, lazima kuwe na njia ya kuaminika isiyo na mpatanishi na iendelee kufikika. Kimbinu hii inamaanisha kutambua wapi sifa imara zaidi za CROPS zinaweza kutumika kwenye miundombinu ya sasa, na kukubali wapi mbadala wa kuaminika unahitajika kwa sababu motisha za kiuchumi zinapendelea ujumuishaji, utambulisho na udhibiti.
Tabaka la Mtumiaji
Kundi la tabaka la mtumiaji linaweka kazi ya EF kuwa na msingi kwa watumiaji na mashirika yenye maslahi muhimu katika matumizi ya mamlaka binafsi ya Ethereum, na katika kupanua zana na kanuni za matumizi hayo kwa upana iwezekanavyo. Linasaidia EF kuelewa uwezo ambao ni muhimu zaidi, aina za kushindwa ambazo ni mbaya zaidi, na maelewano (tradeoffs) ambayo yanakubalika kufikiwa inapobidi. Kazi yake inajumuisha makundi ya watumiaji, wasifu wa watumiaji (personas), nyenzo za kuelimisha, utafiti wa matumizi, na tathmini ya athari. Lengo si kwa EF kuwa studio ya bidhaa, bali kuhakikisha maamuzi ya Tabaka la Itifaki na Ufikiaji yanaundwa na watumiaji halisi wa sasa na watarajiwa, vikwazo halisi, na vipimo halisi vya mamlaka binafsi.
Tabaka la Jamii
Kundi la jamii linamiliki jinsi EF inavyoonekana ulimwenguni, ndani na nje ya mfumo ikolojia wa Ethereum. Kazi yake ni kuweka wazi kile ambacho EF inasimamia, na jinsi hilo linavyotofautiana kimsingi na kripto ya kifedha isiyo na faida kwa wote (zero-sum), kutoka kwa kripto iliyoathiriwa na mashirika, na kutoka kwa sehemu zisizo na mvuto, zinazohifadhi hali ilivyo na zenye motisha potofu za usimamizi wa ruzuku katika ulimwengu usio wa faida ambazo ziko hatarini kutumiwa kusafisha maslahi ya kijiopolitiki. EF imejitolea kuongeza thamani ya jamii yake kwa kudumisha uhuru kutoka kwa haya na mwingiliano mwingine usio na tija.
Kundi hili pia linajenga uhusiano wa EF nje ya kripto. Mamlaka binafsi yana washirika wa asili katika programu na vifaa vya chanzo wazi na huru, salama na vinavyotanguliza matumizi ya ndani (local-first), katika utafiti na utetezi wa faragha na kriptografia, na katika uhuru wa kiraia, wavuti iliyogatuliwa, na teknolojia ya maslahi ya umma, miongoni mwa nyanja nyingine. Kundi hili linafanya kazi kuhakikisha mwingiliano kati ya Ethereum na nafasi hizo unakuwa na matunda, wa hiari, na wa ubora wa juu.
Tabaka la Taasisi
Kundi hili linamiliki kazi ya EF na taasisi zinazounda njia zinazosimamiwa na taasisi kwa watumiaji wa mwisho kuingiliana na Ethereum. Hii inaweza kujumuisha taasisi za kifedha, iwe ni malipo ya watumiaji, bima au vinginevyo. Inaweza kujumuisha biashara zisizo za kifedha, ikiwa ni pamoja na viwanda, kijamii, uchapishaji na tasnia nyingine nyingi. Inaweza kujumuisha matumizi ya serikali. Inaweza kujumuisha vyuo vikuu au vikundi vingine visivyo vya faida.
Katika hali zote, lengo letu ni kutoa kipaumbele katika kuunda mifano ya ujumuishaji mzuri wa Ethereum na teknolojia za kriptografia unaoongeza sifa za CROPS na dhamana zinazopatikana kwa taasisi na watumiaji - kama vile kuhakikisha utekelezaji wa haki na sahihi, kuhakikisha uwezo wa kuhamisha data na kwa ujumla uwezo wa kivitendo wa kujitoa, kulinda faragha ya wahusika wote, kuthibitisha uhalisi wa data, kugundua vizuri zaidi au hata kuzuia tabia mbaya, na zaidi. Tunaamini kwamba biashara nyingi, serikali, na mashirika yasiyo ya faida yatatambua kwamba motisha zao zinapendelea kuwahudumia watumiaji kwa njia zinazoimarisha mamlaka binafsi huku wakihifadhi dhamana wanazohitaji ili kuunda thamani au kutimiza dhamira yao, na kwamba Ethereum na teknolojia za kriptografia zinaweza kuwa sehemu ya kufanikisha hili. Mbali na ushirikiano wa moja kwa moja, kundi la taasisi litafuatilia malengo haya kwa kusaidia kuanzisha na kuwasilisha kwa umakini mbinu bora, viwango, miundo ya marejeleo, na nyenzo za kuelimisha kwa ajili ya kupitishwa na taasisi.
Kundi la taasisi pia linafanya kazi kwa karibu na wasomi na mashirika washirika ya utetezi kote ulimwenguni ili kuhakikisha Ethereum inaeleweka kwa usahihi katika muundo wake wa sasa na uwezo wake, na kufuatilia na kujibu maendeleo ya sera na udhibiti ambayo yanaweza kuathiri dhamira ya Ethereum kwa matumizi ya mamlaka binafsi na kanuni zake za msingi za upinzani dhidi ya udhibiti (na utekaji), chanzo wazi, faragha, na usalama.
Watu wanaoondoka
Kama sehemu ya mabadiliko ya muundo wa EF, shughuli, na matumizi, leo tunaachana na wenzetu 54.
Maamuzi haya yalikuwa magumu, lakini ni ya lazima. Lazima tuwe na rasilimali na kupangwa kwa njia inayoturuhusu kuzingatia kazi muhimu ambayo EF pekee inaweza, na kwa hivyo lazima, ifanye katika miaka ijayo, bila usumbufu mkubwa kutoka kwa mienendo ya soko ya muda mfupi.
Ili kuhakikisha wale wanaoondoka wameandaliwa vizuri kwa mpito, tunatoa kifurushi kinachojumuisha kiinua mgongo na msaada wa mpito. Kiinua mgongo hicho ni kiasi kikubwa kati ya mshahara wa mwezi mmoja kwa kila mwaka aliofanya kazi katika EF na kiasi kinachotakiwa kisheria katika eneo la mtu huyo. Hiki ni kiinua mgongo kilekile tulichowapa wenzetu walioondoka EF katika miezi michache iliyopita. Msaada wa mpito unajumuisha msaada wa kupata mahali papya pa kuchangia katika mfumo ikolojia, pamoja na ruzuku ndogo ya mpito iliyotengwa kugharamia matumizi ya mpito ya mtu binafsi (ushauri wa kazi na mengineyo).
Tunamshukuru kila mmoja wao kwa kipaji, kujitolea, na muda ambao wamechangia kwa Ethereum wakiwa EF, na tunatarajia kuendelea kufanya kazi pamoja na wale watakaopata nafasi kwingineko katika mfumo ikolojia.
Nini kinafuata
EF inayoibuka kutokana na mabadiliko haya ni nyepesi na yenye mwelekeo zaidi. Tutashiriki zaidi katika wiki na miezi ijayo kuhusu jinsi kazi yetu inavyobadilika na jinsi mfumo ikolojia unavyoweza kushirikiana vyema na muundo mpya.